قريت التدوينة الأخيرة متاع المدونة الرشيقة مصير و بصفتي جربي و نعيش في جزيرة فيها اكبر جالية يهودية في الوطن العربي و فيها أقدم معبد يهودي في العالم يبعد عليا 6 كم ..
قلت لازم نكتب عل الحكاية اللي اثارها جاكوب في الفيديو ، لازم قبل كل شي نعترفوا بوجود هذا الشعور المعادي للاسف،
جاكوب قال في الفيديو انو أثناء حرب غزه ظغطوا عليه لكي يقول رايو .. طبعا جاكوب يؤكد انو تونسي ، أنا نقلو ماكش متهم بش تأكد انك تونسي ، كيما جماعه اللي تحب تأكد انها وطنيه حتى حد ما اتهمكم أنكم خونه بش تحاولوا اثبات العكس ههه .
يا جاكوب أنت تونسي و أقدم من بعض التوانسه و احنا ماعناش خانة ديانه في بطاقة التعريف الوطنية . آنت مواطن كامل الحقوق و لست مواطن درجه ثانيه .
التعايش السلمي في جربه وصل لدرجة انو انا قريت في ليسي تكنيك و كانت حارة اليهود على بعد 100 متر و وقتلي كنا تلامذه كنا نخرجو في مظاهرات قصف بغداد 1998 و الانتفاظه 2000 ، و كان زملاءنا اللي يقراو معانا يهود لا يشاركون معنا لكن لم يتعرضوا أبدا للتحرش اللي نشوفوه في باريس مثلا مقتل ايلان حليمي
.
نتفكر مره مشيت ناكل في بريك عند يونه و اعز بريك في جربه عند اليهود :) و معايا جماعه من العاصمة ، قعدنا و بدينا ناكلوا وقتلي اللي معايا شلقو بالبريكاجي يهودي عن طريق الكيبا اللي لابسينها الصغار ،
فما شكون جاه غثيان و رد الماكله ،
الله غالب الظاهره هاذي موجوده و يجب التصدي ليها لانو انا شخصيا نحب اليهود كشعب عظيم و ذكي 129 جائزه من جوائز نوبل اخذها يهود مقابل 7 للمسلمين فقط .
ديجا أول واحده حلت مدرسة لتعليم الاعلاميه في جربه اني قابله و كان اول كونتاكت مع الانفورماتيك غادي قبل حتى ما تععم الاعلاميه عل المعاهد العموميه .
Articles
