ملخص الحديث أن الديمقراطية الحقيقية يلزمها وقت باش المجتمع بكلو ينضج موش النظام بركة . المجتمع وقتها كان يستهلك في حكايات الثورة البلشفية والثورة الناصرية ويتصور أنو التغيير الاجتماعي ما يحصل كان بالثورة والعنف معناها ماهوش يفكر في الديمقراطية وعلى هاذاكا النظام ما ينجمش يفكر وحدو في الموضوع .
والدواء كان من جنس الداء وعالج بورقيبة موضوع العنف بالعنف .أما منذ التحول فالموضوع ما عادش كيما قبل على خاطر بن علي حب منذ 87 يبني نظام ديمقراطي وبدا عطا جريدة للخوانجية سموها "الفجر" وعطا جريدة لجماعة البوكت سموها " البديل" وتعمل مؤتمر 18 لاتحاد العام لطلبة تونس 1988 ومؤتمر اتحاد الشغل 1989 في سوسة
واستقبل وقتها كل المعارضين حتى حمة الهمامي في قصر قرطاج وتم إمضاء الميثاق الوطني وتمت مراجعة قانون الجمعيات وتم وضع قانون جديد للأحزاب وتمت في أكثر من مرة مراجعة المجلة الانتخابية باش تدخل المعارضة للبرلمان . تقول انت تي هاي ثمة معارضة أخرى ماخلهاش النظام تتحرك نقلك هاذيكا المعارضة اللي ما عندهاش برنامج واللي تحب تزيح بن علي من السلطة حتى لو كانوا هوما مقتنعين إلي هو خير منهم ويعمل في بارشة حوايج باهية للبلاد واللي هوما كعبتين وكعبة ولو كان عندهم تأثير على مجريات الأحداث راهو ما تجاهلمش بن علي على خاطر بن علي ما هوش يلعب وهاذاكا علاش آنا قلت المعارضة ماعندهاش برنامج .. تو بربي اللي باش يعارض في تونس آش باش يقول :
1 بطالة صحيح آشنو الحل الخوانجية يقولو للناس السذج اللي تبع فيهم الحل هو في إعادة المرأة للمنزل تو يلقاو البطالة آش يخدموا وموش لازم نعلق على ها العبقرية ولخرين آشنوا يقترحوا من كل حسب طاقته ولكل حسب عمله ومن بعد كيف لمور تتريقل تولي حسب حاجته مهناها آنا نتصور والله أعلم أنو خدمة واحد يخدموها ثنين ولا ثلاثة وشوف التنمية وشوف الاشتراكية .. اشتراكية الفقر مؤكد اللي الحلول اللي يقدم فيها بن علي هي الأفضل آما كان نخدموا الناس الكل ومهما كان الثمن تو نجوعوا أغلبية الشعب التونسي ونحب نقول اللي نحن في تونس في مستوى 14% نسبة البطالة ونحبو إن شاء الله نهبطوا بيها لحد 10% وقتها تصبح المشكلة هامشية بالحق على خاطر الدول المتقدمة كلهم نسبة البطالة فيهم 7 و8 و9 في المائة .
2 فقر باهي برا نمشي معاك : بن علي من 1992 خرّج أكثر من مليون عبد من دائرة الفقر ومازال الراجل شاد صحيح يحب يقضي على الفقر في تونس ويعمل في البرامج ويعصر في الوزرة والولاة باش ينجحوا مشاريع مقاومة الفقر حتى لين وصلت نسبة الفقر في تونس حاليا 3.8% وماهوش راضي
3 ما ثماش ديمقراطية ما يسالش نمشي معاك آما الديمقراطية مسؤولية أشكون ياخي هي مسؤولية النظام وحدو وإلا مسؤولية الجماعة اللي متبنيين العنف الثوري والحاكمية لله واللي الديمقراطية بالنسبة ليهم ماهي إلا مرحلة . المشكلة أنو بعض الديمقراطيين اللي مختلفين مع النظام وعندهم الحق في ذلك مسايرين الجماعة هاذوما وناسين اللي هاذوما أكثر خطر على الديمقراطية من بطء الاصلاحات الديمقراطية حسب زعمهم
4 عدم توازن جهوي : شوف برامج الدولة في التشجيع على الاستثمار في المناطق الداخلية وبرامجها في دعم موش الجهات المعتمديات ذات الأولية اللي تم إحصاؤها وهي 53 معتمدية وجهلها الرئيس برامج خصوصية .
الحقيقة موضوع الديمقراطية والمعارضة في تونس والغناية متاع حقوق الانسان قاعد يجاوب عليها الشعب التونسي بعدم الاكتراث وعدم الاهتمام على خاطر الناس تحب قراية صغارهم ونجاحهم وخدمتهم ورعاية صحية وكياسات أحسن من اللي عندنا ونقل خير وتحب شوية تفرهيد آما المطالب الكبيرة متاع النخب يلزم النخب تعرف كيفاش تمررها للشعب باش يتبناها ويدافع عليها وراهم الناس ما همش أغبياء حتى كانوا ماهوش قارين ولا بسطاء يفهموها وهي طايرة اللي يحب الشعب يفهمو موش يدزوا في مواجهة النظام ياكل العصا باش سيادتو يشد البليصة ومن بعد يقول آش كان يعمل بن علي .. تي هاو باهي أعملوا كيفو بدلوا الأسامي باش تضيعوا الجُرّة بركة . بربي اللي باش يكسرلي راسي بالاعتقاد في كونه صاحب الحقيقة اللي ما بعدهاش يقيلنا يرحم والديه على خاطر هذا راي ينجم يكون صحيح وينجم يكون غالط .. ناقش الرأي وابد رأيك ودعنا نساهم معا في بناء مستقبلنا وإن بكلمة .
Articles
