و تسقط ورقة التوت عن مدعي النضال ضد الحجب

نحب نسجل موقفي فيما يخص الحملة ضد نسمه و نقول اني مع حرية التعبير و تعجبني نسمه موش خاترني كلوبست فقط اما خاتر حتى حد ما يفرض عليا بش نتفرج في التلفزه مع العايله و زيد أنا ضد الإقصاء و منطق هذا فساد و هذا باهي ، كل واحد حر حر حر

نفس السيد اللي صور الكاريكاتور هذا

هو من يطلق الآن في الفايسبوك حمله ضد نسمه ناعتا القناة بالنقمة و انا اذ اترك المجال للمتضررين أنهم يقوموا بنازله هم احرار في توقيتها فاني أقول و للمره الألف لن يثنيني شي عن فضح هؤلاء الراقصين على حبال الكذب فما يرددونه من شعارات لا يطبقونها إنما هي مطية لتحقيق أهداف سياسويه ضيقه ..

معتمدين منطق عدو عدوي عدو .. منطق هدام و فاسد يهدد المكاسب الحداثية في تونس ... أقلام مأجورة للإخوان تحركها آلة دعائية ضخمة ..

و الله لو مزقوني اربا لأترك هذا الامر ما انا بتاركه الا ان اهلك دونه ..

و تسقط ورقة التوت عن مدعي النضال ضد الحجب.......

هذا القرار رقم سبعه متوجها لي بالخطاب ، في إحدى الحوارات المثمرة التي طالبوني بإقامتها و عدم قفل باب التعليق مذ وطئت قدماي البلوغسفار ..

سابعا: الرسمي... مدونتي، او مدوناتي... او بش نكون واضح اكثر أي مدونة تكون ليّ فيها سلطة الإشراف ماهوش مرحّب بيك فيها... اي كومنتار ليك بش يتم حذفو مباشرة فور التفطن إليه، مهما كانت صيغتو و الظرفية اللي ورد فيها.
حتى الكومنتار هذ مش بش يكون ليك أي رد عليه "هنا" و أي رد بش يتم فسخو من قبلي انا المرة الجاية.
نظن اكثر من هكة وضوح ما ثماش.. إن شاء الله تكون فيك بعض من همة و تفهم روحك.

القرار أسعدني حقيقة و سيريحني من عناء التعليق على التدوينات الفاشلة و يثبت كلامي و يؤكده ..

يعرف الجميع اني في الفايسبوك منذ 18 شهر راكش على روحي نتابع في المدونات و نعرف المدونين الكل منذ 18 شهر تاريخ إنشاء هذه المدونة لم أدرجها في التن بلوغز ..

نقرا في التدوينات و ما نعلقش و ما نكلم حد ، لكن وقتلي اقدم دلاعه على جبدان سيرتي وقتها ستوب ،

كثر خيرو حسين ما عطلش في ادراج مدونتي

و كانت اولى التدوينات بقلم السيد طارق الكحلاوي الاخ المدون حميده 1 و 2 و 3 نشر اولاها في الفايسبوك مدعيا دعوة بعض التجمعيين لقراءة ما اكتب ..

مبعد جات بنت عايله و انتيكور و كانت الحوارات معاهم و موجوده نسخ منها قمة في الاحترام و ما نفوتش الفرصه بش نقول شكرا لانتيكور اللي تدخل بالحسنى بيني و بين السيد طارق و انتهى الإشكال مذ ذلك الزمان ..

للأسف بعد ان ضاقت الحجه بأهلها و مرت المدونه متاعي بفتره قصيرة من التجاهل ، رجعوا بثوب جديد للمزايده هههه

و الله أمر مضحك ،

نحب نقلكم هاك الزويز اللي قالولي اش تبيع ، اي ما نبيع شي صافا ؟

انا مواطن تونسي و من حقي بش يكون عندي مدونه و من حقي نقول رأيي و من حقي ننتمي للحزب اللي يعجبني و انتم بتهجمكم عليا قاعدين تخسروا في مصدقيتكم بكل بساطه عند بقية المدونين و عند الناس اللي تقرالكم و لذلك انا أشجعكم عل المواصله و كل تدوينه تجبدني سلبيا او ايجابيا هي في صالحي ههههه و لكن لا يشعرون .