عاملين توزيع ادوار ولا شنوه

و الله عندي مده نتبع في فيديوات و التسجيلات الصوتية متاع فري مغرب ، كل مره نعمل روحي سمعت و ما سمعتش و نقول حكاية فارغة ، أصلا مافماش أمكانيه لحوار بناء مع هؤلاء الناس ،

لكن هذا الفيديو يا كريم مختار مانجمتش نتحملوا !!!

بالحق بيزار و غريب اش قاعد يصير في الفايسبوك ، تحكي عل المدونين حك راسك حل مدونه ، ياخي أنت ما حكيتش راسك حليت موقع تبارك الله !!

و اهو معاك ناس تخدم مصلي عنبي .. و قعدات و نقاشات في اتجاه واحد .. الرأي و نفس الرأي .. الأجانب عمرهم ما ينظروا لبلاد نظره خايبه لان شبابها يحتج على شيء معين ، بالعكس العملية هاذي موش اساءه لصورة تونس ، هذا أمر مفيد انو هناك حراك تعددي و نقاش ...

أتذكر في حوار الشباب في المنتدى الالكتروني النقاش كان حامي الوطيس و ما قال حد انو اذا أجانب قراو الحوار بش ياخذو فكره خايبه على تونس

ياخي وقتلي الفرانسيس يتناقشوا على قضيه في قناة فضائيه فرنسويه يؤدي هذا لنقص فيا لسياحه الفرنسيه ؟ لا بالعكس يا ايها العلامة المعلم مختار كريم ، أنا كأجنبي نشوف الفرنسيس تتناقش حول البرقع مثلا او حول انتخابات معينه ، نعمل كيف عليهم ، هذا يثبت أنهم عندهم مناخ تعدديه و حرية تعبير و ديمقراطيه ،

تي الحكومة قررت إعطاء كوتا للمعارضة لمساعدتها في تطوير المسار التعددي في البلاد تجي انت طوا تستعير شعارات الحكومه اللي تقالت في سياق غير السياق اللي سيادتك قلتو تستعيرها و تحاول انك تزج بها في حربك الخاسرة ضد بعض المدونين تعتبرهم اسلاموفوبيين ؟

الخطر عل السياحة هو الديسكور متاعك العنصري .. موش شباب مدونين ، أكثرهم يكتب في حاجات معتدلة و نقد بناء ... نعرف ماكاش بش تفهمني اما والله جوست حبيت نوري الفيديو لبقية المدونين ،

كثرتلها يا كريم يا وخي .. ياسر تخلويض ، و ماشي في بالك استعارتك لبعض شعارات الحزب الحاكم ستجعلك في موقع قوه لتمرير أفكارك ..

شوف انا ما نتهمكش انك متطرف او ظلامي ..

لا أنت إنسان عادي تتبنى في كلام شعبوي -غوغائي

populiste

و رائج في تونس و عندك طرف فلوس او يعطوك في ترف فلوس الله اعلم عملت موقع تحس روحك انك حققت بيه حاجه في حياتك ..

أنت حر ان تعتقد ما تشاء يا سي مختار و أنت حر ايظا انك تعمل فيديو و موقع و أذاعه لكن وجود صفحاتك النيره في كل المبيدات الحشريه يخليني نشك ، و زيد المدون الغايب عل الساحه تيتوف اللي عندو بريد الكتروني مربوط بالموقع متاعك و اللي حسب كتابتو ما يوافقكش الراي لكن في نفس الوقت حليفك الايديولوجي ،

اش قاعدين تكمبنو و تخططوا ، عاملين توزيع ادوار ولا شنوه .. أما جو عليكم و على خطابكم .. ياسر سطحي و بودورو ،

نشالله سي مختار يتسع صدرك لجملة الانتقادات هاذي و برا ربي معاك ما عندك وين توصل !!!