تي الحجب شويه فيها المدونة متاعك

تلقيت رسالة من مواطن كريم لم يرد الكشف عن هويته قال لي فيها :'' أه ماك قلت انك منفتح للحوار و تؤمن و تناضل من اجل الحق في الاختلاف ؟ شبيك ما جاوبتش عل الجماعة اللي وجهتلك انتقادات ؟ ''

نحب نجاوب الأخ الكريم عبر هذه التدوينة و أطمئنه أني لم أتهرب من النقاش أبدا بالعكس اقترحت تحويله لمناظرة صوتية في البالتلك مع من يريد لكن للأسف ما رد عليا حد .

و هناك من قرر مقاطعتي اثر حوار مطول تحت احد مقالاته... و نظرا لتكاثر الردود و أشباه الردود لقيت روحي سوبمارجي فما انا إلا بشر نعيش 24 ساعة 8 سوايع خدمه و 8 سوايع نوم و لست شمسا تسطع عل الجميع ،

تصور طبعت كل ما كتب عني في البلوغسفار منذ شهر خاتر عينيا تعبت من القراية في الشاشة فتحصلت على كتاب مؤلف من 60 صفحه !! لذلك نطلب من الاخوه المدونين الأفاضل أنهم يشدوا الصف تو نرد عليهم واحد واحد ،

ايا عيش وليداتي

نظموا رواحكم و حاولوا تكونوا مختصرين و اقراو ردودي السابقة نقعدشي انا نجاوب على نفس السؤال 50 مرة ،

يا ناس يا عالم ، يا مدونين ، أنا لم ادعي أني احتكر الوطنية و لم اخون أحدا بالاسم . المدونة هاذي عمرها أكثر من عام و الأرشيف يشهد فانا أدون لاني مقتنع بجملة من الأفكار و نحب نعبر على رأيي موش قمت الصباح قلت برا نعمل مدونة نركب بيها الموجه .

انا مواطن تونسي لم يطلب مني احد ان اكتب و حكيت راسي حليت مدونه اشبيه ؟

حرام ؟

ممنوع ؟

زاد يقول اني لازم نستنى ردة فعل سلبيه على قراري كمواطن تونسي اني نعبر على رايي ؟ هههههه علاش شنوه الجرم اللي ارتكبتو ؟

سي زاد يقول ان التجمعيين كالمستوطينين الاسرائيليين في الضفه !!

Toi et tes amis ressemblez à ces colons israéliens qui s'étonnent de l'hostilité de leur voisins arabes qu'on a délogé.

و مبعد يقول شبيها المدونة متاعي محجوبة هههههه يا حبيبي ، ايه سي زاد سب الناس و تو نزيدو نعلقولك وسام !!

تي الحجب شويه فيها المدونة متاعك . احنا مستوطينين في بلادنا يا بوقلب ؟ و مبعد يقولك لا انتوما تحونوا فينا ؟ مهبول انت ؟ مي سي با نرمال !! للدرجه هاذي يوصل الحقد و الكره بالعباد ؟

يا زاد التجمع ماهوش فوق القانون او فوق النقد و نعاود و نقول مانيش المتحدث الرسمي باسمو في الانترنات .

اهو سي طارق الشنيتي يدون باسمو الحقيقي مدة 4 سنين و نقد المجتمع و نقد التجمع و نقد الحكومة و نائبة تجمعية، ما كلمو حد و لم يقع حجب مدونته !!

و الله كان جات عندي سلطة في البلاد نكرمو المواطن التونسي هاذايا قداش متخلق قداش كلامو موزون .

الناس اللي جبدتني بالاسم الكل بش نرد عليها لانو مادام اسمي مكتوب فحقي في الرد حق مقدس .

باهي آدا كنت أنا تافه و مدونتي تافهة لهذه الدرجة ماعاش تجبدوني و لا تجبدوا مدونتي فالحكماء قالوا لا تجادل أحمقا لانك إن جادلته فلن يفرق الناس بينكما !!

اهو اش قال دلاعه مثلا

Mon ami Hmida Ben Jemaa, excellent communiquant et grande figure du e-militantisme RCDiste

عل الأقل دلاعة كان شويه موضوعي و اعترف بأشياء و نقد أشياء أخرى .

طارق الكحلاوي و بعد سوء تفاهم وصلت معاه لحل وصلت معاه لارضيه مشتركه للحوار على أساس الاحترام المتبادل و تبادلنا تهاني العيد ،

راهو ما اسهلش من السب لكن السب ماعندو وين يوصل لانو يعمق الشروخ في جسد الوطن الواحد و بين أبناء الوطن الواحد .

علاش ؟

لست داعية كره او إقصاء و لا اكتب بالفصحى فرنسية كانت او عربيه بل بلهجة الشعب من الشعب و إلى الشعب .

و قبل ما نكمل لازم نشكر كل ما ساهم في الإشهار المجاني للمدونة رغم أننا ممنوعون من التصويت في تن بلوغز .

براس أمك يا حسين شوفلنا حل سي با جوست راهو .

.