انأ مقتنع انو الحجب في عالم الانترنت ليس بدعة تونسيه كيما يقول برهان بسيس و بالمناسبة انا نقدرو برشا الراجل هذا و ساعات نحسو قدوه ليا ، و اليوتوب ممنوع ايظا في السودان ، و الحمد الله في بلادنا ماعناش مدونين معتقلين مثل الفرحان في السعودية و كريم عامر في مصر و المدون المعزبي الذي نسيت اسمه الذي وقع اعتقاله مؤخرا .
و مانيش ضد غلق بعض المدونات الغبية مثل مدونة قاسم و زاد . بالعكس كان يعطوني شويه سلطه في البلاد نسكر شطر المدونات التونسية الموجودة حاليا ههههههه و نبدا بمدونة ايما بنجي ههههه و المدونات اللي تمنع الناس أنها تعلق بحريه او التي تسب و تشتم .
بالعكس اعتبر غلقها أمر شرعي فلا حرية لأعداء الحرية و هذا شعار انأ مقتنع به .
و . كان المهبول يحب ياكل قصعه العاقل ما يعطيهالوش.
الم تمنع قناة المنار من البث في القمر الاروبي هوتبرد الم تمنع امريكا نشر صور جنودها القتلى و كما قال برهان او بوبكر الصغير نسيت من بالظبط للدول مصالح كبرى قد تمر فوق مصالح الافراد..
لكن اليوتوب و الديليموشن اللي محجوبين منذ 2007 بصراحة استغرب غلقهما ، خاصة و انو نفس الفيديوات الموجودة و اللي بعضها يحرض عل الإرهاب و لا ننكر وجود هذه الفيديوات .. و كان موش يقع اتهامي بنشر مثل هذه الفيدويات لاعطتيتكم بعض الروابط . مثلا برهان في هذا المقال يصف احد هذه الفيديوات ..
نفس الفيدوات موجوده في الفايسبوك و الفايسبوك فيه مليون تونسي .. و حجب البروفايلات لا يمنع الدخول للفيدوات .
فلا ادري ماذا استفدنا من حجب اليوتوب ؟؟
الطوا الاعلام متاعنا مازال كيما عام 84 وقتلي قناتنا الوطنيه رابخه بومزيود و إسرائيل تقصف في حمام الشط و التوانسه يتفرجوا في اخبار بلادهم عبر الراي اونو !!
مانيش عارف إلى متى ، انا متفائل انو اليوتوب سيقع فتحه قريبا في اطار الانفتاح اللي قاعدين نشوفو فيه في قناة حنبعل مثلا برنامج في دائرة الضوء . و وقع نقاش هذه المسالة في برنامج حواري جمع العرفاوي و بوبكر الصغير منذ عام .
حقيقة خممت خممت حللت الموضوع بكل النواحي لم اجد سببا واحدا مقنع يبرر استمرار غلق هذه المواقع ، و حجبها اصبح ثقل و يشكلي انا شخصيا حرج مع الاجانب و مع المدونين اللي يتاجروا بهذه القضايا و يستغلوها للطعن في مكاسب بلادنا .
بون كل ما قام به المدونون من مظاهرات افتراضيه تدوينه بيضاء ضد الحجب و غيرو كلها كانت سياسويه ضيقه و انا بش نهز المقال هذا و نبعثو لكل الناس المهمين في البلاد اللي عندي في القائمة متاعي لعل يتحرك فيهم واحد من اجل فتح اليوتوب .. بلا تدوينه بيضاء بلا لغه مضروبة .
كل التحركات التدوينيه لفك الحجب غلب عليها طابع الشعبويه و الغوغائية و الشعارات التي تصعد و لا تحاول إيجاد حل بقدر ما تريد ان يستمر هذا الحال لانو في الأخير في صالحهم . و اطلب من الجميع يعمل كيفي كان تحبو اليوتوب يتحل ...
Articles
