لذا قيدوا و لا تدعوا تونس تقع في ايدي اقصى اليمين او اقصى اليسار

أمس مشيت بش نقيد في الإنتخابات ..

عارضوني في الثنيه 5 من معارفي ، أصدقاء طفولة و معارف سطحية .. الكلهم فرد كلمة ، ياخي صحيح الكلام اللي يتقال عليك في الانترنت ، اللي انت انديك متاع بوليسيه ، خساره ساعه عايلتك عايله كبيره و عرش كبير في جربة و الناس كل تحبكم ، علاش تمسخ في العايله متاعك .. طبعا انا شرحت الوضعيه و دافعت عن نفسي ، و لكن يزداد عمق استغرابهم عندما نقلهم اني ماشي بش نقيد في الانتخابات .. ياخي موش منعوكم انتوما ؟ اباي ; مافيباليش هذاكا فصل 15 يخص الترشح موش الانتخاب و ثانيا ما يمنعش الناس الكل من الترشح ، 2400 مناشد حسب ما يقولون فقط سيقع منعهم و من تحملوا مسؤوليات اما المنخرطون العاديون فلن تسلط عليهم اي عقوبه ..

واحد قاللي يا ولدي احشم على روحك ، تي الناس الكل تحكي بيك في جربة و يقال انو هناك عصابة تعد نفسها لقتلك .. استجابة للنداء الذي وجهته اكبر صفحة ثوريه في تونس فيها 750 الف عضو ..

قتلو بالعكس انا نشكرهم جدا عل الاشهار المجاني و قتلو في السياسه يا عزيزي لا ترمى فيها بالحجر الا الاشجار المثمرة و لو كنت غير مؤثر لن يهتم بك احد و الاهتمام سلبي او ايجابي هذا هو المطلوب لانو السلبي قد يهدم في ثواني معدوده بعد ان يراكم معرفة الجمهور بيك .

قالي ما اكسح قلبك ياخي ماكش خايف تترزى في عمرك راك مازلت صغير يا سخطه و ما عملت شي في حياتك لا دار لا كرهبه و لا اسست عايله كيف ندادك ، قتلو انا معرس بتونس و لا يهمني في اي مكان اكون فوق أرضها او تحتها . حاصيلو مشيت بش نقيد امس نلقى الريزو طايح ، و رجعت من غدوه قيدت و لم تاخذ العمليه اكثر من 3 دقايق ، حتى العون المكلف بالتقييد قالتلي ياخي انت هو أحميده متاع لانترنات و علامات الدهشه على وجهها ، قلتلها ايه انا هو بشحمي و لحمي . قاتلي ياخي شنوه تخدم ، قلتها تقني اعلاميه هوكا قدامك مكتوب في بطاقة التعريف الوطنية ، قالتي وين البيرو متاعك قلتلها هوكا بجنب الفارماسي .. قالت لي و الله من كثرت ما يحكو عليك نحسابك سخطه كبيره ، اديب ولا مفكر ولا استاذ جامعي ولا محامي ، خاطيك خوك قلتلها راني جرد مواطن زوالي ساعات ما نلقاش عشا ليلة ،

لكني اعشق هذا الوطن حتى الثماله و عندما اخرج من عقلي اكتب 4 خطوط في مدونة لا يقرأها احد فأحس اني ارتقيت من مرتبة حيوان يأكل و يشرب و يمارس الجنس لمرتبة إنسان ينتج يفكر و يدلي برايه و يناقش فاحس بنفس من السعادة انا محروم منها بسبب ظروفي المنيله بستين نيله .

إيه نسيت بش نقول حاجه مهمة للإخوه الدساتره من كل الاحزاب لانهم تفرقوا في كل الاحزاب بدون استثناء حتى النهضة فيها دساترة .. لقد قدم لنا الشعب التونسي فرصه تاريخيه وقع تطهير جسدنا المناضل فيه من كل مظاهر الفساد ، نحب نقولكم اخواني الدساتره انو الامور هاذي تقع في كل التيارات الكبيره و العريقه .. و انو امتداد الفكر الدستوري عبر التاريخ و الجهات ، أحنا بناة تونس كيما قال جغام .. احنا اللي حررنا البلاد من فرنسا و لن ندع حزب فرنسا يحكم تونس ، احنا اللي بنينا تونس ،

وضعية الحزب في الحكم جعلت الكثير من الانتهازيين يفرتكوه من الداخل ، و ها قد بان لكم الانتهازي و النزيه بدون ادنى جهد يذكر ..

الاخوه الدستوريين ، اللي جدو حارب فرنسا ما ينجم يكون كان دستوري ، هو و بوه و اخواتو و عرشو الكل ... هذه فرصه تاريخيه لكم و لبلادنا لا اقول لافتكاك الحكم رغم انو هذا امر شرعي اثر انتخابات ، لكن اقول فرصه تاريخيه و بالتصويت الحضاري المدني كي نظهر و نعرف نحن ايضا حجمنا الحقيقي في المجتمع و حتى ان كنا 1 % من التونسيين فحقنا مصون في التعبير عن رينا كأقليه ..

لا تدعو الحملات المغرضه تأثر عليكم او تقولوا وينهم الزوز ملاين ... هناك الكثير من الأخطاء وقعت في الماضي و كل التيارات الفكريه تقوم بمراجعات و تأكدوا انو التونسي ذكي و ماهوش دغفه بش يصدق كل شيء .. الهيئة متاع بن عاشور عرتهم و كشفتهم امامكم و امام الشعب

اعزائي ، هؤلاء عا'رقون في خزعبلاتهم الايديولوجيه الغير مفيدة ؛ هؤلاء يسبون و يشتمون في بعضهم و هم ليسوا برلمانا حقيقيا بسبب حزعبلات ايديلوجيه و يكذبون على بعضهم ، هوكا بن حسن شاكي بالكحلاوي و بن عاشور قال كلاما مضحكا عل اليحياوي و القضاة و اليحياوي في نسمه ايضا رد عليه من غدوه ههههه .

مهازل يا شعبنا العزيز لا تليق بأمتنا التونسية العظيمة و عرت هؤلاء من يدعون انهم ديمقراطيون و هم غير قادرون حتى عل الحوار مع بعضهم ،

إنسحابات متتالية من الهيئة . هؤلاء في الحقيقة أحزاب دكتاتورية و يستعملون في أساليب العنف و يا تعطيني ما اريد يا ننسحب و نتهمك انك مطبع مع اسرائيل ، ماذا سيفعلون بحرية التعبير عندما يصلون للحكم اذا كانت تصرفاتهم هكذا و هم لازالو في طور التكوين . شباب السقوط فالت على حركة السقوط كما قالت الدكتوره رجاء و الله يا شعبنا العظيم انها لمهازل .

و انت أمامك الصندوق و اختار من تريد بكل حرية و لعلها من مهازل الزمان ان من قام بهذا اللوقو هو نفسه من كتب التعليق الذي اصبح شعارا الفوق في المدونة .

لذا قيدوا و لا تدعوا تونس تقع في ايدي اقصى اليمين او اقصى اليسار . صوتوا للوسطية و الوسط .